Menu
CRÚA é o meu espazo en Carballo. Aquí fabrico as miñas pezas e vivo rodeada de barro e fotografías. Tamén serve como punto de encontro para quen queira achegarse a conversar, observar ou aprender, pois non é so o meu lugar senón o de todos e todas as que queiran participar.
Este espazo compartido acolle os obradoiros CRÚA. Terás todos os materiais e ferramentas precisas para a creación das túas propias pezas cerámicas.
Poderás atopar pezas de cerámica feitas con moito mimo, así como fotografías e o libro Buño de seu. Ademais, tamén se fan pedidos baixo encargo.
O taller mestúrase coa tenda e co obradoiro para que poidas experimentalo e formar parte del. Aquí poderás atoparme traballando cada día.
Para meter as mans no barro non precisas nin experiencia previa, nin habilidades extraordinarias, nin pertencer a un grupo de idade en concreto. Tan só fan falla ganas de experimentar e permitirte a ti mesma seguir os teus ritmos.
Nos obradoiros traballaremos distintas técnicas de modelado en sesións de 2 horas. Estes encontros están dispoñibles para todas as idades e niveis, porque todos e todas somos quen de traballar coas mans!
Neste obradoiro semanal para nenos e nenas de 6 a 12 anos exploraremos diferentes técnicas e ferramentas para tocar, sentir e dar vida ás nosas grandes ideas.
Traballaremos o barro, debuxaremos e pintaremos con diferentes materiais, experimentando todas as opcións posibles para manchar as mans.
Prezo: 70 EUR / mes / persoa
Grupos dispoñibles os xoves de 17:15 a 18:45
O que faremos será unha sesión de dúas horas de modelado de barro na que cada quen dará forma á súa propia peza.
Empeza explicando un pouco o proceso das pezas cerámica dende que nacen ata que chegan á nosa mesa, para despois pasar á parte práctica. A partir de ahí, vouvos guiando para que cada quen faga as súas propias pezas. Pasado un tempo, en canto estea lista (seca, cocida e esmaltada), avisareivos e poderedes pasar a recoller a vosa creación.
Grupos dispoñibles para todas as idades a partir de 6 anos.
Prezo: 35 EUR / persoa
Estas sesións prográmanse segundo a vosa dispoñibilidade. O que fago é recibir as vosas propostas e abrir grupos cando haxa un mínimo de tres persoas interesadas.
Verémonos unha vez á semana durante un mes onde aprenderedes distintas técnicas de modelado e darlle forma ás túas propias pezas.
O que faremos son catro sesións de dúas horas de modelado de barro. Empezan explicando un pouco o proceso das pezas cerámica dende que nacen ata que chegan á nosa mesa, para despois pasar á parte práctica. A partir de ahí, vouvos guiando para que cada quen faga as súas propias pezas. Verémonos unha vez á semana para facer sesións similares á primeira pero cada día aprendendo distintas técnicas de modelado.
Na última clase, decoraremos todas as nosas pezas con pigmentos e pasado un tempo, en canto estean listas (secas, cocidas e esmaltadas), avisareivos e poderedes pasar a recoller as vosas creacións. Cada mes haberá unha nova convocatoria!
Prezo: 90 EUR / mes / persoa
Próximas convocatorias:
Outubro – mércores 2, 9, 16 e 23 de 19:15 a 21:15
Novembro – martes 5, 12, 19 e 26 de 17:00 a 19:00
Decembro – mércores 27 de novembro 4, 11 e 18 de decembro de 19:15 a 21:15
Se xa fixeches o curso mensual pero aínda tes ideas pendentes ás que darlle forma, temos grupos semanais onde continuar afrontando novos retos.
Para unirse a estes grupos é imprescindible ter cursado un obradoiro mensual previamente.
Prezo: 90 EUR / mes / persoa
Grupos dispoñibles os mércores de 17:00 a 19:00 e os xoves de 19:00 a 21:00
Ven disfrutar cos peques da casa dunha sesión de modelado de barro!
Cada menor virá acompañada dunha persoa adulta e xuntas faredes as vosas propias pezas.
Prezo: 35 EUR / persoa
Agasalla un vale por calquera dos obradoiros anteriores. A data será aberta e máis adiante poremos o día e a hora.
Prezo: variable segundo o obradoiro elixido
Se estás buscando un obradoiro de barro a medida, noutra ubicación ou para un grupo en especial, ponte en contacto comigo e buscaremos a forma de facelo posible.
Prezo: variable.
Se che gustaría levar os obradoiros de barro á túa escola, podes poñerte en contacto comigo e buscaremos a forma de facelo posible.
Prezo: variable.
BUÑO DE SEU ten fotografía, texto e quero pensar que tamén un pouco de olería. Ten algo de meu e moito de seu. Porque aínda que é froito dunha producción persoal, o que conta non son máis que as historias dos oleiros e oleiras de Buño.
Comezou cando aínda era inverno e as horas de leria nos talleres eran case sinónimo dunha catarreira. Coa chegada da primavera saquei a cámara e en maio escribín as historias que acompañan ás imaxes.
Foi en xuño de 2021 cando lle dei forma e corpo ás páxinas para chegar, xa en manga curta, á exposición de BUÑO DE SEU como traballo final de carreira.
De ahí en adiante adiquei moitas horas a facer e refacer. O libro e a súa función medraron cos días e, en agosto de 2022, viu a luz a primeira edición autopublicada de 500 exemplares.
Se queredes mercalo recoméndovos pasar polo taller ou preguntar nas tendas e obradoiros dos oleiros e oleiras de Buño. Tamén o podedes encargar persoalmente a través de Instagram, email, teléfono ou cando nos vexamos pola rúa.
Carballesa de nacemento pero sobretodo de corazón. Falo pouco e ás veces demasiado baixo, mais teño mans creadoras. Non son fotógrafa, oleira ou ceramista, mais desfruto de afrontar novos retos coas mans sen etiquetas.
Estudei Belas Artes na Universidade de Vigo tratando de combinar traballos plásticos e fotográficos. Sinto predilección polos proxectos sociais, solidarios e educativos, a producción artesanal, a cerámica e a fotografía documental. Dende a praia de Razo e despois de ter pasado por Madrid, Perú, Bilbao ou Berlín, a miña derradeira aterraxe trouxome de volta á casa, onde continúo día a día ampliando a miña formación tanto artística como persoal.
En agosto de 2022 publiquei o meu primeiro libro, “Buño de seu”. Este traballo documental e fotográfico sobre os oleiros e oleiras desta vila supuxo o meu achegamento definitivo ao mundo da cerámica.
Actualmente estudo Educación Primaria e en novembro do 2022 abrin as portas dun espazo que materializa as miñas aspiracións creativas: CRÚA, un obradoiro de cerámica en Carballo.
